DIY my Wedding Favor

呢個items完全係玩死自己既大攪作, 之前已有人勸我唔好送布丁玻璃樽糖果, 一來運送好重, 二來做死自己!
但我就係對呢種布丁樽情有獨中, 同埋我深信用心製作一份禮物俾每位來賓, 一定會好開心!

就係咁, 我堅持喺淘寶買, 然後經物流公司運咗400 個黎 !!!
但運到黎有好多都難咗, 大陸人始終唔信得過, 明明講好要每個樽包紙,
好在之前叫佢運多10幾個, D 樽真係好啱啱好呀!!!

跟住洗樽,  老公堅持要煲水沖樽, 所以全部都經過高溫處理架!

9 月, 富士康員工過黎幫手開工, 兩位男士負責洗樽抺樽, 其餘我同另外兩個女員工就整請帖

11月5日。因為怕D糖唔可放得耐, 所以要結婚前一段時間先可以將糖入樽,
1. 之前就貼定logo 貼紙
2. 將D糖晒走等佢無咁多沙糖, 因為買咗果隻糖原來好多粗沙糖
3. 入樽
4. 貼好絲帶, 同埋Thank You  tag (事前仲要逐張圓形印thank you )

係咪好救命浪費時間之作呢?????? 我諗呢到整咗我地起碼兩日全日 !!!!

最後既製作品, 係我既theme colour 紫紅同銀色 (D 絲帶仲要係喺飛龍行買最貴果隻靚野)
心形糖果 係好辛苦搵到黃竹坑既批發商到買返黎
呢part野真係勁浪漫人力物力......希望我既賓客真係鐘意同留起個樽啦!!!!

運送物資果日仲精彩!!! 總共有五箱回禮禮物!!!! 諗起都覺得自己超人!!!

大日子心情 --- 接新娘及敬茶篇

過咗一個好倉猝既影女家過程後, 就拿拿琳同媽咪老豆哩埋喺房等佢地玩新郎!

我一路喺門後偷聽, 覺得好好笑!

雖然時間好緊逼, 好彩都玩得晒三個遊戲!



本身傾好既遊戲有:

1. Yoga 動作 ( 因為有材料, 懶得整, 所以都係玩呢D 啦)

2. 我的字典裡沒有放棄 ( 呢個我勁想玩佢, 因為我知佢覺得首歌好難頂)

3. 喜怒Sweet
樂 ( 全因當時興變身男女chok chok chok , 我就諗到呢個遊戲,
當然唔好要「苦」呢個字, 改sweet 啦)

喺門後聽到佢地話玩喜怒sweet樂先幾驚佢地唔玩「我的字典裡沒有放棄」呀! 好彩原來佢地想將好戲壓在後頭!

不過我聽在場人士講, 老公佢好自動波, 有好多野都冇叫佢做佢玩得好投入!

出黎前一刻攝影師要成班兄弟都要咁樣做, 攪到我勁唔好意思囉!

又唔知點解佢要跪喺度, 我心諗 :「好老土呀! 唔該你快D 起身啦」

到咗敬茶俾由細照顧住我大既嫲嫲, 呢刻真係好感動, 因我嫲嫲喊晒

又因男家習俗要敬埋俾過身既親人, 所以要敬埋俾爺爺, 嫲嫲一叫我爺爺飲茶, 我都想喊埋一份!

到最後敬埋俾家姐, 又係一個感動位,
雖然我同我家姐唔係話好好感情, 成日互串, 但我敬茶俾佢一刻佢同我講 :「唔好再刁蠻任性」
我就忍唔住喊出黎.......好在都最後......我抺得切眼淚.....唔係個妝就麻煩 !

大日子心情 --- 等待與準備

由於掉動電腦Data 關係, 仲未搵到回到未嫁前既相, 所以寫住大日子心情先!

喺11年11月25日夜晚, 帶住少少緊張既心情 (反而前兩晚仲緊張過今晚) 2:00 訓著咗!
好在, 都算訓得好, 一覺訓到第二朝,
我仲懶咗幾分鐘床, 當時天又未光, 屋企人冇個起身, 一個電話都冇, 就諗住hea 下啦,

喺我啱啱洗完面果陣, 6:25am 幫我化姊妹妝既Sam Sam 就已經黎到我屋企,
當時我真係諗: 「咁準時架, 可唔可以遲到呀!  kakakak....」
佢黎到就提醒我...唔可以再hea 啊! 呢個時候我媽先起身招呼住佢地, 又即時搵地方化姊妹,
冇耐,6:30am 我化妝師Rainbow 都黎埋, 拿拿琳為我塗Nars 急救jel同化妝,

當時幾憺心班姊妹遲到, 好在第一個住對面既姊妹好準時咁就可以化先,
陸陸逐逐有人上黎, 都唔知邊個打邊個, 因為Rainbow唔俾我郁黎郁去同講野咁制!

聽住出面好熱鬧, 好想知佢地攪成點, 話咁快已經 9點幾, 但Rainbow都仲未化完妝,
即時由我間房轉場地入阿媽間房既廁所Set 埋頭, 真係好緊張, 因已超晒時, 都未攪掂, 我想出去影多D 相囉!
依家好後悔唔再約Rainbow 早多半個鐘黎化妝, 當日成個流程就係因為朝早遲咗而成個rundown 都遲晒!

大約9:30 am左右我終於出得去影相, 有放監既感覺  
一出去就派利是俾姊妹, 見住陪伴我長大既姊妹們, 再加埋個擁抱, 原來係有感動既感覺, 死啦, 咁快就想喊, 死忍! (相後補)

到咗指定動作, 媽咪幫我拉拉鍊, 以前睇人地D 相同same-day-edit 會覺得呢動作好假好刻意,
但原來到媽咪幫我拉一刻, 真係好感動好想喊架, 覺得終於出嫁既感覺!

總括黎講, 我覺得早上既感覺係最強烈同最深刻, 其他時間好似唔知自己做乜咁, hahahaa

Vendor Review --- 大埔海濱註冊場地

 

康民處呢個場地真係好好, 雖然地點比較唔方便, 但我地安排咗旅遊車從大埔火車站接載賓客,
本來海濱張場地物料借用申請表只提供 4張長枱、2個帳篷、2個實位。
但因為我要攪埋 calering, 我就借咗 5張長枱, 一張for 證婚、一張for photo albums table、另外三張放野食同野飲!
我仲借多咗2個帳篷, 連車位都攞多2個, 佢地既員工非常好, 好易話為, 但就要最尾一星期先confirm 到可唔可以借到咁多囉!

最驚喜係佢既新娘房原來好大仲啱啱新整好, 所以我換上the one 都係喺海濱個新娘房呢, 好乾淨仲有成3 格廁所, 咁就唔使著住件婚紗去公廁啦

好多人以為我婚禮用咗好多錢, 其實呢個租場 、場地佈置加埋野食都只係用咗 一萬元左右,
但最緊要要加自己既DIY 同佈置, 盡可能發揮場地既特式。

(都係果句：因人而已, 唔係絶對呀!)

回到未嫁前---過大禮篇

被人笑我又話update blog , 我自己都知係要記錄返之前既野, 再唔記我會失憶! 所以我又回顧blog ,hihi!!

今日係結婚三個月, 先記一記第一個大日子, 過大禮!
其實過大禮呢個環節, 令我地最最唔開心, 亦因為咁鬧過幾次交,

首先, 攞餅問題, 攞餅前兩日,我問老公諗住點將D 餅運到男家
佢竟然答 : 「到時先算啦, 我一個攞都得啦, 好少咋ma」
我話:「你唔係諗住攞住D餅坐巴士呀ma?」
佢又答:「攞咗再睇咩情況啦!」
我話:「你call 定van 啦, 唔使安排下呀???」
佢仍然不作安排, 也不找人幫忙。
攞餅當日,我仍然忍唔住幫佢, 同埋佢都CALL 咗VAN, 佢當然攞得辛苦啦, 事後佢話:「男人幾唔點都唔會喺女人面前話唔得」!!吹佢個悵!!!

第二件事, 問佢過大禮人選有咩人,
佢話:「我、阿媽、姨媽得啦!」
我話:「咁少人? 你三個點攞得晒呀?  人丁又單薄!! 」
又因為咁而唔開心, 好在最後佢都前一晚搵咗伴郎同佢阿妹, 因為我阿媽可以喺前一晚先同我講話婆婆話過大禮老公同66 都唔可以在場囉!!!

第三件事, 當日, 原來我阿媽預備咗好多回禮,
我老公同佢一家就覺得佢地過大禮過得唔好睇, 因為帶去比攞走更多, 搞到勁唔好意思咁!
由於大家都唔知識呢D禮節, 所以都唔知究竟係咪回禮比佢地帶去更多係正常 (到依家都冇再追究)
實情我阿媽果邊就冇所謂, 而且都滿意, 但老公仍有少少謹謹於懷!


過大禮終於都叫完成, 見到人地過大禮可以好開心, 自己就搞到咁,  多麼艱辛的旅程!!

恭喜發財, 開心渡過2012

 

我回歸blog 敕!!!!

我真係要努力寫返之前既野, 因為我開始對自己wedding 同honeymoon忘記得一乾二淨呀!!!
加上, 好多朋友睇見我去完芬蘭都好想去, 所以我要努力寫返Travel Blog !!
見到朋友因為我而受感染真係好開心!!!
但有兩位朋友就話要冬天去完先生仔, 希望我唔會累到你地做人計劃啦 !!! hahahaaa

今年第一年派利是, 
因為D 人話第一年要派雙封,
我同老公都大出血,
其實已經好慳唔派咁多大銀碼!!!

今年第一年, 真係好想設計新年利是封派,
但因為去完honeymoon 返黎都冇時間, 一路忙忙忙,
所以整唔切利是封, 又怕貴老公唔鍾意,
好彩老公俾我下年整, 希望到時仲有動力啦!!!

雖然冇得印利是封, 但一早已諗定用返婚後物資,
因為我之前訂利是封訂咗兩隻款,
所以剩咗好多金色,
但如果就咁派又覺得好唔新年,
好在喺paperart 俾我搵到好多新年印仔,
用埋我之前買落好多embossing powder , 唔好浪費呀!!!!

出黎效果都好靚呀!!!!

Back from our sweet honeymoon

兩星期既蜜月之旅, 超開心!!!
估唔到我地真係睇到北極光, 第一晚睇唔到時真係好失望架, 得返第二晚一個機會, 真係好worry 睇唔到白黎白俾錢!!!

真係好好運, 我地第二晚睇到呀!!!!! 而且仲要係Dancing Aurora , 仲要維持咗個幾鐘,
我覺得我真係一個好好運同好幸福既人, 不敢高叫 "Thanks God !!!"
一睇到的一刻我地開心到抱住跳咗上黎, 跟住我就感動到勁喊, 感覺到呢生無憾, 眼淚都結成冰,
如果唔係怕成對眼結冰, 我會繼續喊,
因為, 原來當你達成由細到大既夢想, 仲要同你愛人分享到時真係好好好感動架!!!!
激動得制,
對腳底開始冇知覺, 好驚呀!!! 所以睇咗一個鐘就返酒店啊, 其實我仲好想睇落去架, 但老公已經唔俾啊!!!

人們說新婚的夫婦睇到綠光會一世好運, 我信架!!! 多謝綠光!!!!!

遲下再還blog !~~~